شێخ حەسەنی جەهرومی دەڵێت: ئەو ساڵەی ڕێم لە جوندیشاپوور کەوت، قسەیەکم لە محەمەدی مەهتاب بیست، تا ماوم ئازارم دەدات. بینیم لەبەر هەتاوی هاوین دانیشتووە و بەن دەڕێسێت و لەبەر خۆیەوە گۆرانی دەڵێت. وتم پیاوی خوا، فێری ئەوینداریم بکە، تا بە وێنەی ئەوینداران خوا بپەرستم. محەمەدی مەهتاب وتی: سەرەتا بڵێ، ئایا هەرگیز خەتێکی جوان، تۆی حەپەساندووە؟ وتم: نا. وتی: هەرگیز پشکووتنی گوڵێک لە باخچەی ماڵەکەتدا، خەمە بێشومارەکانی لە بیر بردوویتەتەوە؟ وتم: نا. وتی: قەت دەنگێکی خۆش و دڵکێش، خرۆشاندوویتی؟ وتم: نا. وتی: هەرگیز ڕوومەتێکی جوان، وای ژێروژوور کردوویت، نەزانیت چی بە چییە؟ وتم: نەخێر. وتی: هەرگیز لەژێر نمەنمی باراندا دەنگت هەڵبڕیوە؟ وتم: نە. وتی: هەرگیز لە چاوەڕوانیی بەفردا، لە ئاسمانت نواڕیوە، تاوەکو بە دەموچاوی خۆتیدا بهێنیت و گەرمای ناخی پێ دامرکێنیتەوە؟ وتم: نە. وتی: هەرگیز بزەی منداڵێکی نازدار، تووشی مەستیی تامەزۆریی کردوویت؟ وتم: نا. وتی: هەرگیز غەزەلێک، یان دێڕەشیعرێک، یاخۆ وتەیەکی پاراو، هێندە بێئاگای کردوویت، ئەگەر دانیشتبیت، هەڵبستیت و گەر بە پێوە بیت، دانیشیت؟ وتم: نا. وتی: هەرگیز ڕۆشنیی ئاو، یان بەرزیی سەرو، یا نەرمیی پەڕەگوڵ، یاخۆ تێکۆشانی مێروولەیەک، فرمێسکی شادیی لە چاو دەرهێناویت؟ وتم: نە. وتی: قەت بووە، لەبەر کەنینی کەسێکی تر، بکەنیت و لەبەر گریانی کەسێکی تر، بگرییت؟ وتم: نەخێر. وتی: هەرگیز زیاد لەو کاتەی بە خواردنیەوە بەسەری دەبەیت، چاوت لە سێو یان هەنارێک بڕیوە؟ وتم: نا. وتی: هەرگیز عاشقی کتێب، نیگار یان فێرکارێک بوویتە؟ وتم: نە. وتی: هەرگیز دەستت بە ڕوومەتی خۆتدا هێناوە و لەگەڵ چاو و گوێچکە و برۆی خۆتدا دڵداریت کردووە؟ وتم: نە. وتی: لاچۆ لە بەرچاوم نەفرەتی، بەرد فێری ئەوینداری ببێت، تۆ فێر نابیت.