خانمه‌‌ گێله‌که‌

نووسینی : ئەنتۆن چێخۆف وەرگێڕانی : هێمن خورشید
ئەدەب 2020-05-23 کۆمێنت 861 جار بینراوە
چه‌ند ڕۆژێک له‌مه‌وبه‌ر «یوولیا فاسیلیڤنا»ی په‌روه‌رشیاری منداڵه‌کانمم بانگ کرده‌ نووسینگه‌که‌م، تا مووچه‌که‌یی بده‌مێ. پێم گوت دانیشه‌ یوولیا، با هه‌قوحیسابێک بکه‌ین، گومانم نییه‌ تۆ زۆربه‌ی کات پێویستت به‌ پاره‌یه، به‌ڵام هێنده‌ شه‌رمنی قه‌ت داوا ناکه‌یت.

   وا ڕێک که‌وتبووین مانگانه‌ سی ڕۆبڵت بده‌مێ. گوتی: چل بوو. گوتم: نا، له‌سه‌ر سی ڕێک که‌وتین، له‌لای خۆم تۆمارم کردووه‌. من هه‌میشه‌ هه‌ر سی ڕۆبڵم داوه‌ به‌‌ په‌روه‌رشیاره‌کان‌.

   تۆ دوو مانگ له‌ لای مه‌ کارت کردووه‌. گوتی: دوو مانگ و پێنج ڕۆژ. گوتم: ڕێک دوو مانگه‌، ئاوها له‌ لای من تۆمار کراوه‌. که‌واته‌ هه‌قه‌که‌ت ده‌کاته‌ شه‌ست ڕۆبڵ، نۆ یه‌کشه‌ممه‌ی تێ ده‌که‌وێت، پاره‌ی ئه‌و نۆ ڕۆژه‌ی لێ ده‌شکێنین، چونکه‌ تۆ له‌ ڕۆژانی یه‌کشه‌ممه‌دا هیچت فێری «کوولیا» نه‌کردووه، ته‌نیا له‌گه‌ڵ منداڵه‌کاندا ڕۆیشتووی بۆ گه‌ڕان و پیاسه‌کردن. دوو مانگه‌که‌ سێ ڕۆژی جه‌ژنیشی تێدا بوو، ئه‌ویشی لێ داده‌شکێنین.
  
   وه‌ختێ‌ وام گوت، ڕوخساری یوولیا ڤاسیلیڤنا گرژ بوو و به‌ په‌نجه‌کانی ده‌ستی قه‌راخی کراسه‌که‌یی لوول ده‌کرد، لێ حه‌رفی له‌ زار ده‌رنه‌چوو. له‌سه‌ر قسه‌که‌م به‌رده‌وام بووم: گوتمان سێ ڕۆژی جه‌ژنی لێ ده‌رده‌که‌ین، مایه‌وه‌ دوازده‌ ڕۆبڵ.

   چوار ڕۆژیش کووليا نه‌خۆش بوو، له‌و ماوه‌یه‌دا نه‌یده‌خوێند، تۆ وانه‌ت ته‌نیا به‌ «ڤاریا» ده‌گوته‌وه‌. سێ ڕۆژیش ددانت ده‌ئێشا، هاوسه‌ره‌که‌م ڕێی پێ دایت دوای نیوه‌ڕوان وانه‌ نه‌ڵێیته‌وه‌، دوازده‌ کۆی حه‌وت، نۆزده‌. ئه‌مه‌یشی لێ ده‌شکێنین، مایه‌وه‌ چلویه‌ک ڕۆبڵ. ته‌واوه‌؟

   چاوی چه‌پی یوولیا ڤاسیلیڤنا سوور هه‌ڵگه‌ڕا و فرمێسکی تێ زا، لێوه‌له‌رزه‌ی پێ که‌وت و یه‌ک دوو جارێک به‌تووڕه‌یی کۆکی و چڵمی سڕی، به‌ڵام وشه‌ی له‌ ده‌و ده‌رنه‌چوو.

   گوتم: پێش جه‌ژنی سه‌ری ساڵ کووپێک و قاپێکت له‌ ده‌ست به‌ربوونه‌وه‌ و شکان، بۆ ئه‌وه‌یان ته‌نیا دوو ڕۆبڵ ده‌شکێنین، هه‌رچه‌ند نرخی کووپه‌که‌ گرانتریشه‌، ئاخر‌ شتێکی بۆماوه‌ بوو، به‌ڵام قه‌ینا خوا بتبه‌خشێت، ده‌بێت به‌وه‌نده‌ قه‌ره‌بووه‌ قایل بین.

   به ‌هۆی که‌مته‌رخه‌میی تۆوه‌ کوولیا به‌ دره‌ختدا هه‌ڵگه‌ڕا و کراسه‌که‌ی دڕا، بۆ ئه‌وه‌یش ده‌ ڕۆبڵ داده‌شکێنین. هه‌ر به‌هۆی که‌مته‌رخه‌میی تۆوه‌، خزمه‌تکاره‌که‌ که‌وشه‌کانی ڤاریای دزی، له‌ کاتێکدا ئه‌رکی تۆ بوو ئاگات له‌ هه‌موو شتێک بێت، چونکه‌ تۆ مووچه‌ وه‌رده‌گریت، قه‌یدی نییه‌ بۆ ئه‌مه‌یشیان هه‌ر پێنج ڕۆبڵ ده‌شکێنین. له‌ 10ی مانگی یه‌ک ده‌ ڕۆبڵت لێ سه‌ندم، یوولیا ڤاسیلیڤنا له‌ژێرلێوه‌وه‌ بۆڵه‌یه‌کی کرد: هیچم لێ وه‌رنه‌گرتوویت. گوتم به‌ڵام لای من وا تۆمار کراوه‌. گوتی: باشه‌ با وا بێت. به‌رده‌وام بووم: له‌ چلویه‌که‌که‌ بیستوحه‌وت ده‌رده‌که‌ین، چوارده‌ی ده‌مێنێته‌وه‌.

   هه‌ردوو چاوی پڕ له‌ ئه‌سرین بوون و دڵۆپه‌ی ئاره‌قه‌ له‌سه‌ر لووته‌ درێژه‌ جوانه‌که‌ی ده‌رکه‌وتن. ئای کچی داماو ... به‌ ده‌نگێکی له‌رزۆکه‌وه‌‌ گوتی: ته‌نیا سێ ڕۆبڵم جارێک له‌ هاوژینه‌که‌ت وه‌رگرت، له‌وه‌ زیاترم نه‌بردووه‌. گوتم: به‌ڕاست؟ بڕوانه‌ من ئه‌وه‌یانم تۆمار نه‌کردووه‌. که‌واته‌ له‌ چوارده‌که‌ سێ ڕۆبڵی تر ده‌رده‌که‌ین. باقییەکه‌ی یازده‌ ڕۆبڵ ده‌کات. ها ئه‌وه‌ پاره‌که‌ت ئازیزم ... سێ، سێ، سێ، یه‌ک، یه‌ک ... فه‌رموو ... ده‌ستم بۆی درێژ کرد، لێی وه‌رگرتم و خستییه‌ گیرفانییه‌وه‌ و له‌ژێرلێوه‌وه‌وه‌ گوتی: سوپاس.

   هه‌ستامه‌وه‌، له‌ناو ژووره‌که‌دا ده‌هاتم و ده‌چووم و ته‌واو تووڕه‌ بووبووم. لێم پرسی: سوپاس له‌پای چی؟ گوتی: بۆ پاره‌که‌. گوتم: هه‌ی له‌وه‌، ئێ من تاڵانم کردیت، ڕووتاندمییه‌وه‌، هه‌ر به‌ڕاستی دزیم لێ کردیت. بۆ ده‌بێت سوپاسم بکه‌یت؟ گوتی ئاخر له‌ شوێنانی دیکه‌ ئه‌وه‌ندەیشیان نه‌ده‌دامێ. گوتم: نه‌یانده‌دایتێ؟ ئه‌وه‌ سه‌یر نییه‌؟ من شۆخیم له‌گه‌ڵ کردیت، وانه‌یه‌کی تاڵم فێر کردیت. پاره‌که‌تت وێ ده‌ده‌م، هه‌ر هه‌شتا ڕۆبڵه‌که‌، ها ئه‌وه‌ پاره‌که‌ته‌ خستوومه‌ته‌ ناو زه‌رفێکه‌وه‌ و ئاماده‌یه‌، به‌ڵام چۆن ده‌بێت ئه‌وه‌نده‌ فه‌قیرحاڵ و بێده‌سه‌ڵات بیت؟ بۆ ناڕه‌زایه‌تیی ده‌رنابڕیت؟ بۆ بێده‌نگیت؟ چۆن ده‌بێت هێنده‌ ده‌ممردوو بیت؟ هێنده‌ گێل بیت؟ به‌زۆرله‌خۆکردن بزه‌یه‌کی کرد، له‌ ڕوخساریدا وشه‌ی «ده‌شێت»م خوێنده‌وه‌.

   داوای به‌خشینم له‌سه‌ر ئه‌م وانه‌ سه‌خته‌ لێی کرد و له‌ کاتێکدا تا ته‌واو شڵه‌ژابوو، هه‌شتا ڕۆبڵه‌که‌م دایه‌ ده‌ستی. به‌شه‌رمێکه‌وه‌ سوپاسی کردم و ڕۆیشت. لە دواوە لێی ورد بوومەوە و بیرم لەوە دەکردەوە، «چەند ئاسانە لەم دنیایەدا بەهێز بیت.»



* دەقی چیرۆکەکە لە زمانی عەرەبییەوە وەرگێڕدراوەتە سەر زمانی کوردی.
تاگ    چیرۆک
ئەدەب
2020-05-23 کۆمێنت 861 جار بینراوە
بابەتی زیاتر
سەرجەم مافەکانی پارێزراوە بۆ وارگەی هاوسانی . Copyright 2020 - hawsani.org © Developed by Kurdsoft
×
هاوسانی