نووسینی: ڕەزا بابایی

وەرگێڕانی: عەلی حسێن

ئەمڕۆ، (٢٢ی ئایاری ٢٠١٩)، من پێم نایە پەنجا و پێنج ساڵییەوە. هەواڵێکی گرنگ نییە؛ بەڵام گرنگە هاوڕێیانم بزانن، ئەم پیاوە پەنجا و پێنج ساڵانە، بە ژمارەی ئەو کتێبانەی نەیخوێندوونەوە، خەفەتبارە؛ بارتەقای ئەو دەستانەی نەیگوشیون، پەشیمانە و بە ئەندازەی ئەو دلۆڤانییانەی نەینواندوون، دڵی بەئێشە. ڕۆژگاری تیژتێپەڕی فریودەر، هەڵیفریواند و داهاتووی وا پانوپۆڕ پیشان دا، هەموو شتێکی هەواڵەی ئەوێ کرد. لە ماڵەکەیدا کۆمەڵێک کتێب هەن، ساڵانی ساڵ چاویان لە دەستی بڕیبوو تا لە ڕەفەی کتێبخانەیان دەربهێنێت و لەسەر مێزی خوێندنەوە، پرشنگیان بەر چاوی بکەوێت؛ بەڵام ئەو هەمیشە بەڵێنی سبەینێی دەدانێ؛ سبەینێیەک، هیچ تایبەتمەندییەکی نەبوو و هیچی لە ئەمڕۆ و دوێنێ زیاتر نەبوو. ئەگەر ئێستاکە لەم پیاوە لەجێداکەوتووە بپرسرێت، تاقە ئامۆژگاریت بۆ لاوان و کەسانی تەمەنناوەندی و تەنانەت بەساڵداچووان و نەخۆشان چییە، دەڵێت، بخوێننەوە و بخوێننەوە و بخوێننەوە. کێشەی ئێمە نەزانی نییە؛ دەردی خۆمان، خۆبەزانازانی و بێمەیلییە بۆ زانین و خوێندنەوە. کتێب تاقانە گەنجینەی دنیایە لە هەناوی زەویدا نەبێت و بە بەرچاومانەوە بێت، کەچی ئێمەمانان نایبینین.