نووسینی:  ڕوئیا حوسێن

شەو بەشێكی تری تەواوكەری كات_زەمان_ە لە تەجەلاكردنی دەسەڵات و حەقیقەتی ئیلاهی، هه‌روه‌ها دەرفەتی ڕەخساندنی هەلومەرجی بیركردنەوەی سالمانەیە تا لە به‌رانبه‌ر تەواوكەرەكەیدا كە (ڕۆژ)ە بە باشترین شێوه‌ بێتە جێبەجێكردن.

شەو ساتی بەیەكگەیشتن و وەسڵی عاشقانە، دەمی عروج و خەڵوەتی توولانییە و، جێگه‌ی گۆڕینەوەی ڕاز و نیازە، كە بە نەزەرم لە هیچ كاتێكدا بەم ئاستەی شەو قووڵ نابێتەوە! چون مرۆڤ لە جیهانی مانادا ڕۆڵ دەگێڕێت و پێویستە هەموو كردەوەكانی بێ خەوش و بێ نواندن و دوور لە چاوی هەموو ئافرێندراوان بێنە جێبەجێكردن.

مرۆڤ بەو ئەندازەیه‌ی كە تایبەتمەندییە مرۆییەكانی ڕێگره‌ له‌ ڕەهابوونی تواناكانی، لێرەدایە شەو دەبێتەوە مەنزڵگەی ئانێ سكوونەت و سەرلەنوێ داڕشتنەوەی توانا مرۆییەكانی.

نالی ئێژێ:

مەڵێن زوڵمەت خەراپە

وەسڵی پەروانە هەر لەشەودایە

شەو نەبێت، هەرگیز پەروانە پەی بە وجوودی شەمع نابات و نایناسێت. ناسین و فیداكاری، پەیامی شەون و مرۆڤ بە تێڕامان بەرەو ئەوجی كەماڵ ڕادەكێشێت و دەرگیری پەیبردن بە حەقیقەتە ئیلاهییەكانی دەكات. هەروەك جوانترین فیداكارییش لە شەودا بەرجەستە دەبێت، كە چۆن بە هەڵهاتنی پرشنگی هەتاو، ون و فەنا دەبێت. بەهەمان شێوە سكوت و شەو ساز و هاوئاهەنگن و، لێرەدا مرۆڤ درك بەوە دەكات لەودیوی جیهانی بینراوەوە شتگەلێك هەن هەر بە سكووت دەتوانێت دركیان بكات و هەر لە دۆخی سكووتیشدایە دەتوانێت جوانترین دەربڕینی هەبێت بۆیان، چونكە كۆمەڵێك حەقیقەتی ئیلاهین و دەم لە ئاستیاندا نایەتە گۆ، بانتر لەوەن بە نوتق و نووسین مانای تەواوی ئەو دۆخە بكات.

یەكێك لە دەركەوتە سەرنجڕاكێشەكانی پەیوەندیی نێوان مرۆڤ و شەو، عیشق و تەنهاییە. ته‌نیایی هاوڕێی دڵخواز و هەمیشەییی ژینی عاشقه‌، بە ئەندازەیەك كە هەست بە بێگانەیی و نامۆبوون بەرانبه‌ر تەواوی بونەوەرەكانی جیهانی مادی دەكات و، ڕوو لە جیهانی مەعنەوی دەنێت، ئیتر شەو بۆ ئەم ده‌بێته‌ دەرفەتی دووركەوتنەوە‌ لە جیهانە مادییەكە و ڕووكردن لە جیهانە مەعنەوییەكە. چون تەیكردنی ئەم ڕێگه‌ ستوونییە پێویستی بە خۆداڕنینە لە گشت وابەستەبوونە دنیاییەكان و دڵبەستەبوون بە ماشووقی حەقیقی و سەنتەربوونی (ئه‌و) لە بیر و هزریدا. كە ئەمەیش مانای هەمان نامۆبوون و هەستكردن بە تەنهایی دەگەیەنێت لەهەمبەر هەموو ئەوانەی كە زمان و جیهانبینیی هاوبەشیان تەنها لە جیهانە مادییەكەدایە و، ئەوان بە نیسبەت ئەمەوە یەك هەنگاویان لە جیهانە مەعنەویەكە نەبڕیوە.