لە كتێبی (الاحلام)ی د.موستەفا مەحموودەوە وەرگیراوە
وەرگێڕانی: ڕێناس ئەحمەد
دونیای مە نامۆیە، ژیانیشمان لە وەهم چێ بووە.
واقیعی دەوروبەرمان وشك و مردوو و بێمانایە، ئەوە ئێمەین بەها و مانای وێدەدەین و، وای لێ دەكەین ڕووحی وەبەر گەڕێت.
كورسی، درەخت، ئاژەڵ، میوە و، ئافرەت شتگەلێكن بە بێمانایی دەمێننەوە تا ئەو كاتەی خۆشمان دەوێن و، تامەزرۆیان دەبین، ئەو كاتە ژیانیان تێدەگەڕێت.
ئافرەت بەبڕێكی فەرامۆشكراو دەمێنێتەوە و، بەتەواوی لە نێو ژیانماندا ونە. ئەو دەمەی خۆشمان دەوێن، دێنە بوون و، دەبنە شتێكی گرنگ كە خۆشبەخت و بەدبەختمان دەكەن.
ئەوە ئێمەین كە گرنگی و بەهای وێدەدەین و، پاشان خۆشمان دەوێت، لەڕاستیدا ئێمە ئەو ئەندێشەیەمان خۆش دەوێت كە بۆ ویمان چێ كردووە، نەك خودی خۆی.
هەر خۆمانین بەرگی ترس دەكەینە بەر شتەكان و، دواتر لێیان دەتۆقین و، لەدەستیان هەڵدێین، ڕاستییەكەی، ئێمە لەو ترسە هەڵدێین كە خۆمان كردوومانەتە بەر شتەكاندا، نەك لە خودی شتەكان بترسین.
ڕاستییەكی زانراوە كە هەموو شتێك كۆتایی دێت، بەڵام ئێمە خۆمان نرخ و گرنگی دەدەینە شتانێك و، دواتریش ئازار دەچێژین بۆ لەدەستدانی لەكاتێكدا خۆمان ئەو گرنگییەمان پی َ بەخشیوە.
لە ئەویندا دەتوێینەوە و، ئەو كەسانەشی تیایاندا دەتوێینەوە، بە سروشت قابیلی لەناوچوون و نەمانن، ئەمەش شتێكی پێكەنیناوییە، كەچی نایشمانخاتە پێكەنین، بەڵكو دەمانگرێنێت و ئازارمان دەدات. چونكە ئامانجەكەمان لێ تێكەڵ دەبێت و، خۆشەویستی دەدەینە كەسەكان، لە كاتێكدا ئێمە ئەو بەهایانەمان خۆش ویستووە كە بۆ ئەو كەسانەمان وێنا كردووە.
ئێمە داماوین، چونكە لە ژیاندا هیچ شتێكی پاك و بێخەوش نییە و، هیچ بەهایەكی پاك و بێخەوشیش نابینینەوە! بەهاكان هەمیشە لەنێو كەسەكاندا چێنراون و، وێناكانیش لەنێو واقیعدا چێنراون.
ئێمە دەروونمان لە نێو جەستەماندا چێنراوە.
ئێمە چنراوێكی سەیرین، لە وەهم و ڕاستی، لە واقیع و وێنا، لە بوون و نەمان، چنراوین!
ئێمە وەهمە گەورەكەین و، ئازارە گەورەكەین.
هونەرمەندەكان لە هەمووان ئازاریان بەسوێترە، چونكە ئەندێشە، وەهم، بیر و، ئازار هەموو مادەی ژیانیانە، ئەوانە چێژ و پیشە و قووتیانە. ئەوان بەروبوومی هزر و خەیاڵی خۆیان دەخۆن.
ئارامی دەیكوژێت، جێگیریی دەیكوژێت، واقیع دەیكوژێت، دڵنیایی دەیكوژێت، تەنانەت باشیش بەشێوە باوەكەی هەر دەیكوژێت.
باشی لای ئەو لە گومانەوە گەشە دەكات و، هەموو بەها، فكر و بنەماكان لە گومانەوە چەكەرە دەكەن و، پەرە دەسێنن و شێوەی نوێ وەردەگرن.
هەمیشە دەبێت لە گێژاوی گوماندا بخولێتەوە تا داهێنان و نوێگەری بكات و، باز بەسەر باودا بدات.
هاوڕێیەكی هەستناسكم هەیە كە هەمیشە لە گومان و دوودڵی و ناڕەحەتی و ترس و خۆشەویستیدا دەژێت. چاوانی خومارن و مۆڵگەی ترسێكی نامۆن، دڵیشی پڕە لە پرتەی نهێنی و، ژیانیشی بریتییە لە جەنگێكی ناكۆتا لەگەڵ ئەم دێوەزمانەدا كە نەسەری دیارە و نە كلك و، هەوڵ دەدات بە چا، قاوە، جگەرە، مەی و، گولاجی هێوركەرەوە بەسەریدا زاڵ بێت، بە خۆخنكاندن لەنێو كتێبدا، لەنێو خەڵك و پێكەنین و هاواردا.
هەندێ جار سەركەوتوو دەبێت و لە دەستی ئەم پەستاوتنە ناوەكییە ڕزگاری دەبێت و دێتەوە نێو خەڵك، ڕادەبوێرێت و هەڵەبەزێت و هەڵەپەڕێت وەك منداڵ.
هەندێ جاریش شكست دێنێت و، تیشكی چاوانی كز دەبێت و، دێوەزمەكان جارێكی تر بۆ نێو ناخی دەیكێشنەوە، چەشنی قووتخواردوویەكی نێو دەریا كە چۆن شەپۆلەكان وردە وردە دەیخنكێنن.
كێشەی ئەوەیە ناخەوێت، شەوگاری درێژی بە ماندوویی و بێخەوی دەباتە سەر، هاوار دەكات و دەپاڕێتەوە تا گولاجێكی خەوێنەری وێدەم.
منیش وەك هەمیشە، گولاجێكی گیایی دەدەمێ و، پێی دەڵێم ئەوە گولاجێكی زۆر بەهێزە، ئیتر بەو شێوازە مامەڵەی لەگەڵ دەكەم كە لە نۆڕێنگە دەروونییەكاندا دەكرێت.
گولاجە درۆینەكە دەخوات و، دوای چەند دەقەیەك چاوانی قورس دەبن، دوای تۆزێكی تر، چاوی دەچێتە خەو و، خۆی دەداتە دەست متبوونێكی قووڵەوە، بەهۆی كاریگەری گولاجەكەوە نا، بەڵكو بەهۆی وەهمەوە، بەهۆی ئەندێشەوە.
نەخۆشییەكەی ئەو وەهمە، چارەسەرەكەشی هەر وەهمە، ئەسڵەن خودی خۆی هەر وەهمە، هەمووشمان هەر وەهمین، وەهم!
وەهم ناڕەحەتییە گەورەیە!