جوبران خهلیل جوبران
بهكوردیكردنی: عهلی حسێن
پیاوێك كه به سواریی ئهسپ بهرهو زهریا گهشتی دهكرد، دهمهو خۆرئاوا گهیشته خانێك له قهراخی ڕێگهكهدا. له ئهسپهكهی دابهزی و وهكو ههموو ئهو سوارانهی بهرهو زهریا له گهشتدان، بێترس له شهو و له خهڵك، ئهسپهكهی لهپاڵ دهرگای خانهكهدا به دارێكهوه بهست و چوویه ژوورهوه.
نیوهشهو، كاتێك ههمووان خهویان لێ کەوتبوو، دزێك هات و ئهسپی گهشتیارەکەی ڕفاند.
بۆ بهیانی، گهشتیارهكه له خهو ههڵستا و زانیی ئهسپهكهی دزراوه. کابرا لهوهی ئهسپهكهی ڕفێندرابوو و لهوهشی كهسێك بیری بۆ دزی ڕۆیشتبوو، خهفهتبار بوو.
ورده ورده میوانانی خانهكه هاتن و له دهوری گەشتیارەکە كۆ بوونهوه و دهستیان به قسه كرد.
یهكهمیان وتی: چ كارێكی گێلانهت كردووه كه ئهسپهكهت له دهرهوهی گهوڕهكه بهستووهتهوه.
دووهم وتی: گهوجانهتر ئهوهیه كه دهست و پێی ئهسپهكهشت نهبهستووهتهوه.
سێیهم وتی: له ههر بارێكدا بێت، گهشتكردن بۆ زهریا به ئهسپ، كارێكی بێئهقڵانهیه.
چوارهمیش وتی: تهنیا كهسانی تهنبهڵ و ئهوانهی له ڕێكردندا خاووخلیچكن، ئهسپ به كار دههێنن.
سهرهنجام كابرای گهشتیار كه تهواو سهرسام بووبوو، هاواری كرد: هاوڕێیان، به دزرانی ئهسپهكهم، ههمووتان یهكسهر دهستتان به پیشاندانی ههڵه و كهموكوڕییهكانم كرد، بهڵام سهیر ئهوهیه، یهك وشهشتان له سهركۆنهی ئهو كهسهدا كه ئهسپهكهی دزیوم، نهوت.