وەزارەتی دەرەوەی ئەمریكا نیگەرانی خۆی دەربڕی لەبەرامبەر بڕیارەكەی باڵی كودەتاچییەكانی میسر بۆ بڕیاری سزای لەسێدارەدان بەسەر سەرۆكی شەرعی ئەو ووڵاتە.

دوێنێ شەممە دادگای تاوانەكانی قاهیرە دانیشتنێكی سازكردو تێیدا دادگای (د. موحەمەد مورسی) سەرۆكی شەرعی میسرو دەیان كەس لەسەركردەكانی كۆمەڵی ئیخوان موسلیمین كردو لەكۆتاییشدا سزای لەسێدارەدانی سەپاند بەسەر مورسی و ژمارەیەك لەسەركردەكانی كۆمەڵی ئیخوان، ئەوەش لەبەرامبەر ڕووداوی راكردنی سەركردەكانی ئیخوان دێت لەبەندیخانەی وادی نیترۆن لەسەردەمی حوكمڕانی (حوسنی موبارەك).

سەرچاوەیەكی وەزارەتی دەرەوەی ئەمریكا نیگەرانی خۆی دەربڕیوە لەبەرامبەر دەركردنی بڕیاری لەسێدارەدان بەسەر (د. موحەمەد مورسی) و پێشی وابووە ئەوە چەندین جارە سزای لەو شێوەیە دەردەچێت و ئەوانیش بەردەوام رەتی ئەو سیاسەتەیان كردۆتەوەو ئەوەش هەرگیز لەگەڵ یاسا نێودەوڵەتییەكان و سەروەری یاسا یەكانگیر نابێتەوە.