زانای ناوداری سووریایی و جیهانی ئیسلامی (وه‌هبه‌ زوحه‌یلی) ڕۆژی  شه‌ممه 8/8/2015‌ له‌ ته‌مه‌نی 83 ساڵیدا له‌ دیمه‌شقی پایته‌خت گه‌ڕایه‌وه‌ باره‌گای په‌روه‌رێنی.

زانای پایه‌به‌رز ئه‌ندامی ژماره‌یه‌ك ڕێكخراوی فیقهی بوو و، چه‌ند ئینسیكلۆپیدیایه‌كی له‌ فیقهی ئیسلامی و فیكری ئیسلامی به‌ گشتیدا نووسیوه‌ و، به‌ یه‌كێك له‌ نوێگه‌رانی ئه‌و بواره‌‌ داده‌نرێت.

گرنگترین به‌رهه‌مه‌كانی خوالێخۆشبوو كه‌ ده‌نگدانه‌وه‌ و كاریگه‌رییه‌كی دیاریان له‌ جیهانی ئیسلامیدا هه‌بوو ئه‌مانه‌ن: (تجدید القفه الاسلامی)، (أثار الحرب فی الفقه الإسلامی)، (الفقه الإسلامی وأدلته – یازده‌ به‌رگ-)، (موسوعه‌ الفقه الإسلامی -8 به‌رگ-) و (موسوعه‌ الفقه الإسلامی والقضایا المعاصره‌ -14 به‌رگ-) له‌گه‌ڵ چه‌ند به‌رهه‌مێكی تریش.

به‌ڕێزیان سه‌ر به‌ هیچ لایه‌نێكی سیاسی نه‌بوون و، له‌ ڕووداوه‌كانی ئه‌م ساڵانه‌ی دوایی وڵاته‌كه‌یاندا بێ ده‌نگیان هه‌ڵبژار و پشتگیری هیچ به‌ره‌یه‌كیان نه‌كرد‌. هه‌روه‌ها شوێنكه‌وته‌ی هیچێك له‌ ڕه‌وته‌ ئیسلامییه‌كان نه‌بوون و له‌م ڕووه‌شه‌وه‌ سه‌ربه‌خۆیی خۆیان پاراستبوو.