ڕێکخراوی هاوسانی وەک پیشەی ساڵانەی خۆی و لە درێژەی کارەکانیدا، ئەمساڵ خێوەتگەی شەشەمی خۆی، بە هاوبەشیی لقی ڕانیەی ڕێکخراوی گەشەپێدانی قوتابیانی کوردستان ڕێک خست. ماوەی خێوەتگەکە 3 ڕۆژ بوو ، لە 2-4ی ئابی 2021 و بە بەشدارییی 100 فێرخواز لە گەرمیانەوە بۆ بادینان. ناوونیشانی خێوەتگەکە «عیرفان و تەسەووف، هەڵسەنگاندن و خوێندنەوەی لایەنە ئەرێنی و نەرێنییەکانیان»  بوو.

تەزکییە بە مانا قورئانییەکەی و عیرفان یان تەسەووف بەوەی ئێستا بەکار دەبرێت، چەند ساڵێکە بوونەتە بابەتی ڕۆژ و گرنگییەکی تایبەتییان پێ دەدرێت و دەیان کتێبیان لەسەر نووسراوە و سەدان کاتژمێر دەربارەیان وتراوە و دەوترێت. وەک هەر بابەتێکی تری نوێ کە دێتە ناو کۆمەڵگەیەکەوە، کەسانێک لەبەر بابەتیبوونی بابەتەکە لێێ دەدوێن و شەنوکەوی دەکەن و بە بابەتی خۆیانی دەزانن. کۆمەڵێکی تریش وەکو منداڵێک کە تازە ئاشنای ئەلفبێ دەبێت و ڕۆژانە پیتی نوێ فێر دەبێت و دەیڵێتەوە، ڕۆژانە شتێکی تازەیان دەربارەی بابەتەکە چنگ بکەوێت، دنیای لێ ئاگادار دەکەنەوە.

عیرفان و تەسەووف، جیا لەوەی ناوێلێکی جوانن، زۆر هەستیارن و پەیوەندن بە باوەڕی ئایینیی خەڵکەوە؛ باوەڕیش وەکو باخچەیەکی پڕ لە گوڵ وایە، گەر ڕۆژانە دەستت پێوە نەبێت و خزمەتی نەکەیت، گژوگیا و دڕک و دەوەن ناشرینی دەکەن. ئیمان پێویستی با پارێزگاریلێکردنە و نابێت با و بارانی خورافییات و قسەی پیرێژنان ژەنگی لێ هەڵبێنێت. ئیمان تا زانین و زانایان لە خزمەتیدا بن، سەرکەشە و لە بەرزیدایە، بەڵام کە کەوتە دەستی خەڵکی نادان و بووە ڕیوایەتی بەر ئاگردان، جوانییەکەی نابینرێت و دەیان کێشە بەدوای خۆیدا دێنێت و ئەوکات ئایین دەبێتە ئەوەی کە مارکس دەڵێت، «ئایین تلیاکی گەلانە.»

لەم خێوەتگەیەدا و بۆ پاراستنی هاوسەنگی و نزیکبوونەوە لە حەقیقەت، بابەتەکانی لە هەردوو دیوەوە قسەیان لێ دەکرا. هێندێک لە مامۆستایان ڕایان وا بوو کە تەسەووف و وەرگرتنی تەریقەت کارێکی باشە و هەیشبوو بە بیدعەی دەزانی. جیا لە مامۆستایان، بەشداربووانییش فرەڕەنگ و بۆ بوون و هێڵی بیرکردنەوەی جیاوازیان تێدا بوو.

لە ماوەی ئەو سێ ڕۆژەدا، 13 بابەتی چڕ و پڕ پێشکەش کران:
1. کۆڕێکی مامۆستا قانع خورشید، لەژێر ناوونیشانی (عیرفان، سۆفیگەری و سۆفییەکان، سێ چەمک و دنیایەک مانا.)

2. کۆڕێکی دکتۆر عوسمان هەڵەبجەیی، لەژێر ناوونیشانی (تەفسیری ئیشاریی قورئان، خاڵە بەهێز و لاوازەکان.)

3. کۆڕێکی دکتۆر قاسم سیوەیلی، لەژێر ناوونیشانی (پێگەی تەسەووف لەنێو زانستە ئیسلامییەکاندا.)

4. کۆڕێکی کاک بنار قەرەداغی، لەژێر ناوونیشانی (عیرفانی مۆدێرنە.)

5. کۆڕێکی م. ئاڤار قەرەداغی، لەژێر ناوونیشانی (بزووتنەوەی خزمەت و فەتحوڵڵا گویلەن.)

6. کۆڕێکی م. فازڵ حەیدەر، لەژێر ناوونیشانی (نوورسی و بزاوتی نوور و پەیوەندییان بە تەسەووفەوە.)

7. کۆڕێکی دکتۆر هێمن خورشید، لەژێر ناوونیشانی (لەخۆدانی سۆفییان لە ڕووی پزیشکی و سایکۆلۆجییەوە.)

8. کۆڕێکی مامۆستا تەحسین حەمە غەریب، لەژێر ناوونیشانی (عیرفانی ئیسلامیی سەردەمی نوێ.)

9. کۆڕێکی مامۆستا شڤان ئیبڕاهیم، لەژێر ناوونیشانی (جیاکاریی شەریعەت، تەریقەت و حەقیقەت.)

10. کۆڕێکی دکتۆر سەید ئەحمەد پێنجوێنی، لەژێر ناوونیشانی (کام تەسەووف قبووڵکراوە و کامە ڕەدکراو؟)

11. کۆڕێکی دکتۆر سەباح بەرزنجی و مامۆستا قانع خورشید، لەژێر ناوونیشانی (گفتوگۆی: سۆفیگەری و بیدعەگەرایی لە ئیسلامدا.)

12. کۆڕێکی مامۆستا دلێر گەرمیانی، لەژێر ناوونیشانی (هۆکار و بنەماکانی ڕەخنەی ئوسوڵییەکان لە سۆفیگەرایی.)

13. کۆڕێکی مامۆستا قانع خورشید، لەژێر ناوونیشانی (گەشتی شێخ محەمەد ڕەشید ڕەزا، لە تەسەووفەوە بۆ سەلەفیبوون.)

نوێژی بەکۆمەڵ و نانخواردن پێکەوە و یەکترناسین و کاری هونەر، بەشێک بوون لە بەرنامەی خێوەتگەکە. هەر لە ڕۆژی یەکەمەوە بەشداربووان دابەش کرانە سەر چەند گرووپێک، بۆئەوەی هەر ڕۆژەی گرووپێک سەرقاڵی ئیشوکاری وەکو ئامادەکردنی چایی، ڕاخستنی سفرە و کۆکردنەوە بن و بە شیوازێکی ڕێکخراو ئیشوکارەکان بەڕێ بکرێن.

لێرە دەتوانن بینەری بابەتەکانی خێوەتگەکە بن:

https://bit.ly/3k31udd